Dörd fəsil

Reproduksiya

Bina "G"

Bu kompozisiya Heydər Əliyev Fondunun kolleksiyasında yer alan Xalq rəssamı Eldar Mikayılzadənin “Dörd fəsil” əsərindən ilhamlanaraq ərsəyə gəlmişdir. Xalça dörd bərabər hissəyə bölünmüşdür və hər hissə bir fəslin özünəməxsus xüsusiyyətlərini və rənglərini daşıyır. Kompozisiya eyni zamanda şaquli olaraq iki yerə bölünür; burada Həyat Ağacları kişi və qadın başlanğıclarını simvolizə edir. Hər iki ağacın qoruyucusu var — biri dişi, digəri isə erkək maraldır. Bu quruluş vasitəsilə təbiətin dövranı, həyatın tarazlığı və yaradılışın iki qüvvəsinin vəhdəti ifadə olunur.

Tarixi kontekst

Əsərin ideyası xalq sənətinin qədim ənənələri və Azərbaycan xalçaçılığının fəlsəfi dərinlikləri ilə bağlıdır. Tarixən, dörd fəsil insanın həyat mərhələlərinə və təbiətin sonsuz dövranına bənzədilmişdir. Bu xalça da həmin ənənənin davamı kimi, insanla təbiət arasında olan əbədi əlaqəni yenidən bədii şəkildə təqdim edir.

Mədəni/Bədii İlham

Kompozisiyanın fəlsəfi və simvolik yanaşması dərin məna daşıyır. Bahar məhsuldarlıq ilahəsi ilə assosiasiya olunur, yay kişi gücü və səbrin təcəssümüdür. Payızdan sonra qış gəlir, həyat sakitləşir və baharla yenidən canlanır. Kompozisiyada həyat enerjisi daşıyıcıları hesab olunan quşlar sanki göylə yeri birləşdirərək xalçaya həyat enerjisi gətirir və ruhun azadlığını simvolizə edir. Əsər sadəcə dekorativ bir xalça deyil, həm də həyatın dövriliyini, kişi və qadın balansını, insanın təbiətlə harmoniyasını fəlsəfi və estetik dildə izah edən dərin mənalı bir sənət nümunəsidir.

Müəllif

Azərbaycanın Xalq rəssamı, Eldar Mikayılzadə

Xüsusi təşəkkür

Bu layihənin həyata keçirilməsinə göstərdikləri dəstəyə görə Azərbaycan Milli İncəsənət Muzeyinə xüsusi təşəkkür edirik.